დღეს მინდა გაგაცნოთ ჩემს მიერ შემუშავებული პროგრამა, რომელიც საშუალებას მოგცემთ ნულიდან(!) 2,5 წელიწადში მიაღწიოთ შედეგს 13 კმ – 48 წთ-ში! პროგრამა დაფუძნებულია ორ მნიშვნელოვან პრინციპზე: 1) თანმიმდევრობა და 2) ყოველდღიურობა. ორივე პრინციპი ძალზედ მნიშვნელოვანია და მათი დარღვევა სასურველ შედეგამდე ვერ მიგვიყვანს. პირველი პრინციპი გულისხმობს, რომ დისტანცია და სიჩქარე დაცული უნდა იყოს პროგრამის მიხედვით. სავარჯიშო პერიოდის მანძილზე აუცილებლად იქნება დღეები, როცა გაჩნდება სურვილი ვირბინოთ/ვიაროთ უფრო სწრაფად ან ნელა, უფრო მეტი ან ნაკლები, თუმცა აუცილებელია, რომ ამ ცდუნებას არ ავყვეთ და ვირბინოთ/ვიაროთ ზუსტად იმდენი, რამდენიც პროგრამაში გვაქვს გაწერილი. მეორე პრინციპი ითვალისწინებს ყოველდღიურობას, რომელიც აგრეთვე უნდა იყოს დაცული, რადგან თითოეული გაცდენა აუცილებლად აისახება შემდგომი დატვირთვის ზრდის ათვისების შესაძლებლობაზე. აქვე, კიდევ ერთხელ დავსძენ, რომ პროგრამა განკუთვნილია სრულიად დამწყებთათვის, რაც გულისხმობს იმას, რომ ადამიანს არასდროს უვარჯიშია სირბილში და შესაბამისად, ის იწყება უბრალო 6 კმ/სთ სიჩქარით სიარულით. ჩვენ არასად გვეჩქარება და შესაბამისად, დატვირთვები იზრდება თანმიმდევრულად, ხოლო მათ ვისაც ეს შედეგი 2,5-წლიანი ვარჯიშის შედეგად ეცოტავება, შეუძლია სცადოს 16 კმ/სთ სიჩქარით თუნდაც 200მ-იანი დისტანციის გარბენა, როცა პროგრამის ბოლოს ამ სიჩქარით ის 13 კმ-ს დაფარავს.
ახლა კი კონკრატულად პროგრამის შესახებ. იგი დაყოფილია 12-კვირიან შუალედებად. ყოველ შუალედში დასაფარი დისტანცია ეტაპობრივად მატულობს 3.2 კმ-დან 12.9 კმ-მდე და იფარება კონკრეტული სიჩქარით. პირველი შუალედი იწყება 6 კმ/სთ სიჩქარით, ხოლო ყოველი მომდევნო 12-კვირიან შუალედში სიჩქარე მატულობს 1 კმ/სთ-ით და ასე 16 კმ/სთ-მდე. პირველი (6 კმ/სთ) და მეორე (7 კმ/სთ) შუალედები არის სწრაფი სიარული. კონკრეტულად სირბილი კი იწყება მესამე (8 კმ/სთ) შუალედიდან. შუალედები დაყოფილია კვირებად. პარასკევობით (სამი გამონაკლისი პარასკევის გარდა) კი სხვა კვირის დღეებთან შედარებით დასაფარია შედარებით გრძელი დისტანცია.
პროგრამა, რიგი მიზეზების გამო, რეკომენდირებულია შესრულდეს სარბენ ბილიკზე სახლში ან დარბაზში. ამ მიზეზებს შორის არის დროისა და მანძილის სრული კონტროლი და რბილი სარბენი ზედაპირი, რომელიც მეტ-ნაკლებად უკეთ დაგიცავთ ტრავმებისგან. აგრეთვე, მესამე შუალედიდან დაწყებული, მორბენალმა უნდა აითვისოს სირბილის სწორი ტექნიკა, რომლიც მარტივად არის შესაძლებელი Youtube-ზე შესაბამისი ვიდეოებიდან. შეგახსენებთ, რომ დამწყებებში ყველაზე გავრცელებული შეცდომაა ქუსლზე სირბილი, ნაცვლად ტერფისა, რაც ზრდის ტრავმის მიღების ალბათობას.
პროგრამა გაწერილია exel-ის ფაილში. საწყის თარიღად პირობითად აღებულია 2018 წლის 1 იანვარი, რომელიც, სურვილისამებრ, შეგიძლიათ ჩაასწოროთ თქვენს მიერ პროგრამის დაწყების თარიღით და შესაბამისად ჩაასწოროთ მომდევნო ყველა თარიღიც.
ყველაფერი ყველაფერზე 